سندھ سرکار نے وفاق نوں جزائر تے کم دی اجازت دا حکم نامہ واپس لے لیا

اسلام آباد/کراچی: سندھ سرکار نے وفاقی حکومت نوں جزائر تے کم دی مشروط اجازت دا حکم نامہ واپس لے لیا۔ صوبہ سندھ دے جزائر تے ساحلاں بارے وفاقی حکومت دے اقدامات تے صوبائی حکومت نے وفاقی حکومت نوں احتجاجی مراسلہ گھل دتا جہدے وچ آکھیا گیا اے سندھ وچ موجود جزائر تے سمندری ساحل صوبائی حکومت دے زیر انتظام اے، وفاق ولوں پاکستان آئی لینڈ اتھارٹی دے قیام تے آرڈیننس دا اجرا غیر قنونی تے طے شدہ شرطاں دی خلاف ورزی اے۔

خط وچ آکھیا گیا اے آرڈیننس دا اجراء کرکے سندھ دے جزائر دی ملکیت تبدیل کرن دی کوشش کیتی گئی، سندھ سرکار نے بہتری لئی وفاقی حکومت نوں آئی لینڈ دی ترقی دی مشروط اجازت دتی سی، پر ہن پہلاں توں کیتی گئی خط و کتابت تے توثیق تے عمل نہیں کراں گے تے وفاقی حکومت توں جزائر تے کم دی مشروط اجازت دا حکم نامہ واپس لے رہے آں۔ سندھ سرکار نے آکھیا طے شدہ امور دی خلاف ورزی کرکے وفاقی حکومت غیر آئینی غیر قنونی اقدامات کر رہی اے، وفاق نے آئین توں انحراف کرکے آرڈیننس دا اجرا کیتا، وفاقی حکومت ہن سندھ دے جزائر وچ نویں شہر بسان دے منصوبیاں تے کم نہیں کر سکے گی۔