پی ٹی آئی سرکار دا اولین مشن عوامی خدمت اے: وزیراعظم عمران خان

کراچی: وزیراعظم عمران خان نے کراچی دے اراکین اسمبلی نوں ہدایت کیتی کہ اوہ اپنے متعلقہ حلقیاں وچ عوامی مسئلیاں دا حل یقینی بنان وچ متحرک کردار ادا کرن۔ گورنر ہاؤس کراچی وچ وزیر اعظم عمران خان نال تحریک انصاف دے ارکان سندھ اسمبلی عمر عماری، ڈاکٹر عمران علی شاہ، ارسلان تاج حسین، بلال احمد، فردوس شمیم نقوی، حلیم عادل شیخ، جمال الدین صدیقی، کریم بخش گبول، محمد علی عزیز، میر رمضان، شہزاد قریشی، ملک شہزاد اعوان، ربستان خان، سید احمد، شاہ نواز جدون، محمد اسلم ابرو، شہریار خان، عدیل احمد، راجہ اظہر خان، ڈاکٹر سنجے گنگوانی، طاہرہ دعا بھٹو، سدرہ عمران، ڈاکٹر سیما ضیا اور رابعہ اظفر نے ملاقات کیتی۔ایس موقع تے گورنر سندھ عمران اسماعیل، وزیر بحری امور سید علی زیدی تے معاون خصوصی ڈاکٹر ثانیہ نشتر وی موجود سن۔اراکین اسمبلی نے وزیراعظم نوں حالیہ بجٹ، کورونا وباء نال نبڑن لئی حکمت عملی تے احساس ایمرجنسی کیش پروگرام دے اجراء تے بھرواں خراج تحسین پیش کیتا۔ اراکین اسمبلی نے وفاق تے صوبے وچکار روابط نوں ہور مستحکم کرن لئی تجاویز وی پیش کیتیاں۔ایس موقع تے وزیراعظم آکھیا عوامی خدمت پی ٹی آئی سرکار دا اولین مشن اے، اوہناں نے اراکین نوں ہدایت کیتی کہ اوہ اپنے متعلقہ حلقیاں وچ عوامی مسئلیاں دا حل یقینی بنان وچ متحرک کردار ادا کرن۔ بعدوں وزیراعظم نال اتحادی جماعتاں دے وفود نے وی ملاقاتاں کیتیاں، ایس موقع تے وزیراعظم آکھیا ماضی وچ اقتدار وچ رہن والی سیاسی قیادت نے عوامی خدمت نہیں کیتی۔ اہوناں نے صرف اپنے ذاتی مفاد دی خاطر اقتدار دا استعمال کیتا، پی ٹی آئی تے اتحادی جماعتاں دا مشترکہ ایجنڈا کرپشن دا خاتمہ، غربت وچ کمی تے عوامی خدمت اے، ایس ضمن وچ وفاقی حکومت سارے صوبیاں بشمول سندھ دے نال ہر ممکن تعاون کر رہی اے۔

اپنا تبصرہ گھلو